Облыстық төтенше жағдайлар жөніндегі департаменті басшылығы қызыл жалыннан адамды құтқарған Мария Симоноваға «Өртте көрсеткен қайсарлығы үшін» медалін табыстады, деп хабарлайды Qyzyljarnews.kz тілшісі.
Бейбіт заманда ерлік көрсетіп, отқа оранған үйден адамды құтқарған Марияның әрекеті әркім үшін үлгі. Бүгін құтқарушылар қала тұрғынының қайсарылығын жоғары бағалады.
Естеріңізге салсақ, қаңтар 1-і күні Жұмысшы кентіндегі жер үй өртке оранған. Мұны көрген Мария Симонова ойланбастан ішке кіріп, түтінге оранған баспанадан 33 жастағы ер адамды алып шықты.
– Әпкем екеуміз қонақтан келе жатқан едік. Жолда қою қара түтін шығып жатқан үйді көрдік. Әпкемді үйден көмекке шақыруға жібердім. Өзім сол жанып тұрған баспанаға кіріп, есікке қарай төрт тағандап келе жатқан ер адам көзге түсті. Оны алып шықтым, – деп естелігімен бөлісті Мария.
