С.Мұқанов, 51 мекенжайы бойынша орналасқан сауда үйдің бірінші қабатында өрт шықты, деп хабарлайды Qyzyljarnews.kz тілшісі.
Оқыс оқиға жайлы хабар облыстық төтенше жағдайлар жөніндегі департаменттің «101» пультіне бүгін сағат 10:44-те түсті. Белгілі болғандай, өрт сауда үйдің бірінші қабатында орналасқан «Магнум» супермаркетінде орын алды. Шақыртуға келген құтқарушылар ғимаратта болған 250 қала тұрғынын қауіпсіз жерге шығарып, отты ауыздықтауға кірісті. Өрт сөндірушілер қызыл жалынды толығымен сағат 12:04-те сөндірді.
Облыстық төтенше жағдайлар жөніндегі департаменттің баспасөз қызметінің мәліметінше, өрт 30 шаршы метр аумақты қамтыды. Әзірге тілсіз жаудың не себептен шыққаны және келтірген материалдық шығын мөлшері белгісіз.
Фото: СҚО ТЖД баспасөз қызметі.
