Петропавлдағы «ЗИКСТО» акционерлік қоғамы заманауи жолаушылар вагондарын шығара бастады, деп хабарлайды Qyzyljarnews.kz тілшісі.
Кәсіпорын «Жолаушылар тасымалы» АҚ теміржол желісінің ұлттық операторының тапсырысы бойынша алғашқы бес вагонды шығарды. Петропавлдағы зауыт жаңа жобаны «Өнеркәсіпті дамыту қоры» АҚ-ның қолдауымен жүзеге асырды. Әр вагонда ұйықтайтын 36 орын бар.
Заманауи вагондар ұзақ қашықтыққа қатынайтын пойыз бағыттары бойынша жүретін болады. Сондай-ақ теміржол көлігінің жылдамдығын арттыруға септігін тигізбек. Осылайша сағатына 160 шақырымды еңсеруге мүмкіндігі бар вагондар жолаушылар саяхатын ыңғайлы ғана емес, жету пунктіне әдеттен тез баруларына септеседі. Мұндай жылдамдықпен тоқтаусыз қозғалатын пойыз Астанадан Алматыға дейінгі қашықтықты 10 сағаттың ішінде еңсермек.
Жаңа вагонның бағасы өзге аналогтарымен салыстырғанда едәуір арзан болмақ. Дегенмен өзінің сипаттамалары, функционалдық және конструктивтік артықшылықтарымен бұған дейінгі шығарылған вагондардан кем түспейді.
