Өткен жылы Солтүстік Қазақстан облысында «Жол активтерінің ұлттық сапа орталығы» мекемесі мамандары 1505 км болатын жолдың сапасын тексерді. Диагностиканың нәтижесі бойынша биыл жазда жалпы ұзындығы 150 км-ге жуық жол учаскелері орта және күрделі жөндеуден өтеді, деп хабарлайды Qyzyljarnews.kz тілшісі.
«Жол активтерінің ұлттық сапа орталығы» РМК СҚОФ баспасөз қызметінің мәліметінше, өткен жылы мамандар республикалық маңызы бар 1505 км жолды диагностикадан өткізді. Оның 152 км бойынша кепілдік мерзімі аяқталмаған.
– Біздің жұмыс бойынша «ҚазАвтоЖол» ҰК» АҚ жолдарды жөндеу жоспарын қалыптастырады. Биыл СҚО-да «Мамлютка-Қостанай» А-21 автожолының 0-4, 18-31, 35-46 км; «Булаево-Возвышенка-Молодогвардейское-Кирово-Қиялы-Рощинское» Р-58 автожолының 199-228,2 км; «Екатеринбург-Алматы» М-51 621-633 км; «Волошинка-Сергеевка-Тимирязево» Р-60 автожолының 0-18 км; «Кокшетау-Рузаевка» Р-11 автожолының 61-92 км орташа жөндеуден өтеді. Ал А-13 «Көкшетау-Кішкенекөл-Бидайық-РФ (Омбы)» автожолының 182-213 шақырымында күрделі жөндеу жүргізіледі деп жоспарланған, – дейді «Жол активтерінің ұлттық сапа орталығы» РМК СҚОФ директоры Жолдыбай Тентеков.
Биыл облыс жолдарының диагностикасы сәуір айында басталып, қазан айының соңына дейін жалғаспақ.
