Бас әскери және Бас көлік прокурорлары енді жаңа тәртіппен тағайындалуы мүмкін. Бас прокуратура «Мемлекеттік билік органдары жүйесіндегі кадр саясатының кейбір мәселелері туралы» ҚР Президентінің Жарлығына осындай өзгеріс енгізуді ұсынды, деп хабарлайды Qyzyljarnews.kz тілшісі.
– «Прокуратура туралы» Конституциялық заңмен прокуратура органдары жүйесінде әскери және көлік прокуратуралары өңірлік прокуратура санатынан шығарылып, оларға дербес мәртебе белгіленді. Осыған байланысты ҚР Президентінің ұсынуы бойынша сайланатын, сондай-ақ ҚР Президенті Әкімшілігінің келісімі бойынша тағайындалатын өзге де лауазымды адамдардың тізбесін Бас әскери және Бас көлік прокурорларының лауазымдарымен толықтыру қажет, — деп жазылған құжатта.
Жаңа өзгеріске сай, енді әскери және көлік прокурорлары Бас прокурордың өкімімен, Президенттің Жарлығымен және арнайы комиссияның шешімімен тағайындалады.
Құжатқа қосымша берілген түсіндірмеде Жарлық жобасын қабылдау мемлекеттік бюджеттен қосымша қаржы бөлуді талап етпейтіні көрсетілген.
Құжатты ашық талқылау 3 ақпанға дейін жалғасады.
