Облыс полицейлері «Шетелдік» акциясының бірінші күнінде Қазақстан Республикасында болу ережелерін бұзған басқа мемлекеттердің 14 азаматын анықтады, деп хабарлайды Qyzyljarnews.kz тілшісі.
Олардың барлығы ел аумағында болу мерзімін бұзған. Уақыты аяқталғаннан кейін еліміздің қонақтары оның аумағынан шығуы немесе жауапты органға мерзімдерін ұзарту туралы алдын-ала жүгінуі тиіс. Сондай-ақ шетелдіктерді паналатып, құзырлы органдарға хабарламаған облыстың 20 тұрғыны жауапқа тартылды. Тәртіп сақшылары қабылдаушы тараптың көші-қон қызметін шетелдіктердің келгені туралы үш жұмыс күнінен кешіктірмей хабардар етуі тиіс екенін еске салады.
– Ашықтық пен қолжетімділік — бұл көші-қон қызметі жұмысындағы негізгі басымдықтар. Қызметкерлер халық көп жиналатын орындарда өткізілетін мемлекеттік қызметтер жәрмеңкесіне, әлеуметтік желілердегі тікелей эфирлерге, өңірлік коммуникациялар қызметіндегі брифингтерге қатысады. Көші-қон қызметі басқармасының әлеуметтік желілердегі аккаунттарында көші-қон мәселелері бойынша кеңес алуға болатын қызметкерлердің телефондары орналастырылған. Сондай-ақ Петропавл қаласындағы 8 (7152) 34-00-50 телефоны арқылы хабарласуға болады. Біз көші-қон заңнамасына қатысты мәселелер бойынша кез келген форматта көмектесуге дайынбыз, – дейді СҚО ПД көші-қон қызметі басқармасының бастығы Талғат Әбілов.
Көші-қон полицейлерінің міндеті – құқық бұзушылықтардың алдын алу, қандай да бір себептермен қиын жағдайға тап болған адамдарды анықтау және оларға құқықтық мәртебесін реттеуге көмектесу. Акция шеңберінде полицейлердің үй-үйді аралауы барысында шетелдіктерге заңнамадағы өзгерістер түсіндіріледі. 27 қаңтардан бастап олардың Қазақстан Республикасында болуы 90 күннен аспауы керек, келесі 90 күндік кезеңді олар шетелде өткізуі қажет.
Фото: СҚО ПД баспасөз қызметі
