СҚО полицейлері үш күн ішінде интернет-алаяқтық жасады деген күдікпен жеті адамды ұстады, деп хабарлайды Qyzyljarnews.kz тілшісі.
Өңірде ақпанның 7-9 аралығында «Anti-fraud» республикалық жедел профилактикалық іс-шарасы өтті. Оның аясында жедел уәкілдер учаскелік полиция инспекторларымен бірлесіп, қаладағы «Дария», «Океан» көтерме сауда орталықтарында түсіндіру жұмыстарын жүргізді. Ақпараттық акцияға қалалық прокуратура қызметкерлері, СҚО әкімдігі жанындағы қоғамдық қауіпсіздікті қамтамасыз ету жөніндегі ведомствоаралық комиссияның мүшелері мен полицияның ерікті көмекшілері қатысты. Тәртіп сақшылары мен алдын алу жұмыстарына қатысушылар мың жарымнан астам ақпараттық парақша таратты. Әрқайсысына банктен қоңырау шалу, интернеттегі хабарландырулар бойынша тауарлар сатып алу кезінде алдын ала төлем жасау сияқты айлакерлердің кең таралған әрекеттері туралы айтылды.
– Бүгінде адамдардың көпшілігі интернет-алаяқтардың әрекеттерінен болатын қауіп жайлы хабардар. Түсіндіру жұмыстары барысында көптеген адамдар бұрын өздеріне әлдебіреулердің “банктен” қоңырау шалғанын және бірден тұтқаны қоя салғанын айтты. Десе де, қаңтар айында облыста 46 интернет-алаяқтық дерегі тіркелді. Желілік қылмыскерлерден келетін қауіп туралы тұрғындарға айтып жеткізу полицияның негізгі міндеттерінің бірі. “Anti-fraud” іс-шарасы шеңберінде ақпараттық жұмыстармен қатар жедел және тергеу жұмыстары да күшейтілді. Үш күнде екі интернет-алаяқтық фактісі ізін суытпай ашылды. Осындай қылмыстарды жасады деген күдікпен 7 тұлға анықталды. Олардың екеуінің желілік алаяқтарға қатысы бар-жоғы тексеріліп жатыр, – дейді СҚО ПД криминалдық полиция басқармасының бастығы Марат Жұмалиев.
