Қазақ ұлттық Өнер университетінің студенті Ернат Сәбитов аталған қысқаметражды фильмді Қызылжар ауданындағы Архангельское ауылында түсірген. Туынды Бейімбет Майлиннің шығармасына негізделіп таспаланған, деп хабарлайды Qyzyljarnews.kz тілшісі mtrk.kz арнасына сілтеме жасап.
Қоюшы-режиссер Ернар Сәбитовтың айтуынша, елді мекенде 100 жылдан астам тарихы бар үйлер аз емес. Кинокартинада бой көрсеткен 18 адам – Ернат Сәбитовтың жоғарғы оқу орнында бірге оқыған достары екен.
– Аталған туындыны өз қаражатыма түсірдім. Әрине, жалғыз өзім түсірдім десем, дұрыс болмас. Мәдениет басқармасы көлік, логистика жағынан жақсы көмектескенін айта кеткен жөн. Досбол Әбдірейісов ағама және де Архангельское ауылының тұрғындарына алғысымды білдіремін,- дейді жас режиссер Ернат Сәбитов.
Қысқаметражды туынды 3 ауқымды фестивальге қатыстырылмақ. Режиссер ұсыныс түссе, телеарналарда көрсетуге ниетті.
