Үкімет кулуарында Қазақстан Республикасы Ауыл шаруашылығы министрі Ербол Қарашөкеев елімізде пияз қоры қанша қалғанын айтты, деп хабарлайды Qyzyljarnews.kz тілшісі.
Ауыл шаруашылығы министрі 2022 жылы Қазақстанда 1,2 миллион тонна пияз жиналғанын атап өтті.
— Пиязға келетін болсақ, былтыр 1,2 миллион тонна өнім алдық. Оның 1 миллионын Жамбыл облысында жинадық. 300 мыңы тұтынуға ғана. Иә, суармалы жерлер бойынша да экспорттық әлеуетті арттыра аламыз. Бұл Жамбыл облысына қатысты. Ең бастысы, бұл көлемнен ішкі нарықты қамтамасыз ету,- деді Ербол Қарашөкеев.
Министр қазір пиязға қатысты жағдай тұрақталды деп есептейді. Оның айтуынша, қазір республика бойынша 70 мың тонна қор болса, оның 30 мыңнан сәл астамы Жамбыл облысында.
— Жамбыл облысында көтерме баға 200 теңге, Астанада 260-300 теңгені құрады. Дүкендерде пияздың түріне, қандай бағамен әкелгеніне қарай 300-360 теңге аралығында тұр. Баға тұрақталды. Жағдай бақылауда,- дейді Ербол Қарашөкеев.
Ол биыл пияз жеткілікті мөлшерде егілетінін атап өтті
