Аққайың ауданындағы Черкасское — Смирново автожолында кондитерлік өнімдер тиелген «ГАЗель» көлігі көктайғақтың салдарынан жолдан шығып кетті, деп хабарлайды Qyzyljarnews.kz тілшісі.
Бұл жайтты байқаған Черкаское ауылдық округінің учаскелік инспекторы Ербол Хасенов дереу қолұшын созуды ұйғарды. Тәртіп сақшысы қызметтік «Нива» маркілі теміртұлпарымен жүк көлігін қар құрсауынан шығара алмаған соң, көмекке электр желілерін тарату компаниясы қызметкерлерін тартқан. Олар «Орал» маркілі трактормен опа қардан жүк көлікті алып шықты.
– Осындай оқиға полиция қызметкері Ербол Хасеновтың тәжірибесінде алғашқы жайт емес. Қаңтар айында ол боран кезінде сол автожолдағы қар құрсауында қалып қойған Петропавл тұрғындарына көмек көрсетті. Көлік салонында әйел мен екі баланы жылыту үшін жақын маңдағы Добровольский ауылындағы үйлердің біріне жеткізген, – дейді Аққайың аудандық полиция бөлімінің бастығы Руслан Сапаров.
Полиция қызметкерлері жүргізушілерге жолдарда қырағы болуға, жол қозғалысы ережелерін қатаң сақтауға шақырады.
Фото: СҚО ПД баспасөз қызметі
