Солтүстік Қазақстан облысында күн жылынып, ауа температурасы көтеріле бастады. Алайда жолдағы күндіз еріген қар түнде мұзға айналып жатыр. Осыған байланысты өңір полицейлері жол қозғалысы қауіпсіздігін күшейтті, деп хабарлайды Qyzyljarnews.kz тілшісі.
15 наурыз күндіз «Челябі – Новосібір» тас жолының Аққайың ауданы арқылы өтетін учаскесінде «Lada Granta» және «Toyota Highlander» көліктері соқтығысып қалды. Салдарынан «Lada Granta» теміртұлпарының 43 жастағы жүргізушісі түрлі дене жарақаттарымен ауруханаға жатқызылды.
– Қазір ауа райы алдамшы. Жол үстінде барынша сақ болу керек. Көктайғақ кезінде жылдымдықты асырмай, қауіпсіз арақашықтықты сақтаған дұрыс. Осы негізгі қағидаларды ұстанатын жүргізушілердің кенеттен қауіп туындаған жағдайда уақытылы шара қабылдауға мүмкіндігі болады, – дейді СҚО ПД жергілікті полиция қызметі басқармасының бастығы Айдын Байматов.
Соңғы екі айда өңірде 33 жол-көлік оқиғасы тіркеліп, үш адам көз жұмып, 62 адам жарақат алды.
