Түркістан қаласында велоспорттан қысқы ел біріншілігі өтті. Жарыста өңір намысын қорғаған спортшылар олжалы оралды, деп хабарлайды Qyzyljarnews.kz тілшісі.
Тас жолда өткен велоспорттан чемпионатқа еліміздің түкпір-түкіпірінен келген велошабандоздар қатысты. Жасөспірімдер арасында командалық жарыста облыс құрамасы 40 шақырымдық қашықтықты еңсеріп, мәре сызығын бірінші болып кесті. Ал топтық сында сайыс қатысушыларына 120 шақырымды бағындыру міндеті қойылып, Михаил Подлужный алтын жүлдеге қол жеткізді.
Жекелей сында 25 шақырымды бағындырған Михаил Подлужный күміс медальді иеленсе, критериум сайысында Мансұр Бейсембай бірінші, Максим Шнакинберг үшінші орынға жайғасты.
Ересектер арасында да жерлестеріміз жүлдегерлер қатарынан көрінді. Командалық жарыста облыс құрамасы 40 шақырымдық қашықтықты бағындырып, бірінші орынға ие болды. Топтық сайыста Владимир Мулагалеев алтын, Павел Воропаев қола медальдарды иеленді. Ал жекелей сында Даниил Марухин 25 шақырымдық қашықтықта бас жүлдені қанжығасына байлады. Критериумда тағы бір солтүстікқазақстандық велошабандоз Александр Семенов алтыннан алқа тағынды.
