Петропавл жолдарында қар еріп, көшелерге мотоциклдер, скутерлер мен велосипедтерді тізгіндегендер шыға бастады. Салдарынан жол-көлік апаттарының орын алу қауіпі жоғарылады, деп хабарлайды Qyzyljarnews.kz тілшісі.
Наурыз айының соңында Потанин көшесінде «Lada Kalina» маркілі көлігі мен скутер жүргізушісінің қатысуымен жол-көлік оқиғасы тіркелді. Салдарынан қос доңғалықты тізгіндеген қала тұрғынына медициналық көмек көрсету қажет болды.
Полицейлердің ақпаратына сәйкес, бұл жол-көлік оқиғасында автокөлікті тізгіндеген жүргізуші кінәлі болып шықты. Оған ҚР Әкімшілік құқық бұзушылық туралы Кодексінің 606-бабы бойынша хаттама толтырылды. Теміртұлпар арнайы автотұраққа орналастырылды.
– Естеріңізге сала кетейік, көлемі 50 текше см-ден аспайтын, конструктивті жылдамдығы 50 км/сағ-тан аспайтын ішкі жану қозғалтқышы бар мопедтер мен оларға теңестірілген қозғалыс құралдарын 16 жасқа толғаннан кейін басқаруға рұқсат етіледі. Бұл үшін жүргізуші куәлігі қажет емес, бірақ жол қозғалысы ережелерін толық білу және сақтау қажет. Маусымаралық кезеңдегі ауа-райында ерекше сақ болу керек, – дейді Петропавл қ. ПБ әкімшілік полиция бөлімінің бастығы Рүстем Тасболатов.
