Петропавлда 2024 жылы керамикалық кірпіш өндірісі қолға алынады. Жаңа зауытты тұрғызуға 9,2 млрд. теңге жұмсалады, деп хабарлайды Qyzyljarnews.kz тілшісі.
Бүгінгі таңда облыстық кәсіпкерлік және индустриялық-инновациялық даму басқармасы «TFA GROUP» жауапкершілігі шектеулі серіктестігімен бірлесіп, кірпіш өндіру жобасын пысықтауда. Зауыт ашылса облыс орталығында 105 жаңа жұмыс орны құрылады. Инвестор кәсіпорынды «Qyzyljar» арнайы экономикалық аймағында тұрғызбақ.
– Қазіргі уақытта жобалау алдындағы және іздестіру жұмыстары жүргізілуде. Іске қосу жұмыстары 2024 жылға жоспарланған. Негізгі қызмет түрі – керамикалық кірпіш өндірісі. Жобалық қуаттылығы жылына 37 млн. дана деп күтілуде, – дейді СҚО кәсіпкерлік және индустриялық-инновациялық даму басқармасының жетекшісі Дархан Әмірин.
