Облыста соңғы үш айдың ішінде 35 жол-көлік оқиғасы тіркелді, деп хабарлайды Qyzyljarnews.kz тілшісі.
Жол-көлік апаттары салдарынан 65 адам түрлі дене жарақатын алған. Сондай-ақ бір адам қаза тапты. Полицейлердің сөзінше оқиғалардың ең көп тараған түрі – бетпе-бет соқтығысу, оның кесірінен 20 апат орын алды.
– Мас жүргізушілердің кінәсінан үш жол апаты болды. Оның салдарынан бес адам жарақат алды. ЖКО-ның тағы бір кең тараған түрі – жаяу жүргіншілерді соғып кету. Жыл басынан бері осындай 9 оқиға тіркелді. Оларда 9 адам зардап шекті, ал төртеуі — белгіленбеген жерде немесе бағдаршамның тыйым салу сигналына өтуіне байланысты. Қозғалыстың барлық қатысушыларына жаяу жүргіншілер өткелдерінде ерекше қырағылық танытуға кеңес береміз. Апаттылықты азайту үшін полиция қызметкерлері жедел-профилактикалық және рейдтік іс-шараларды тұрақты түрде жүргізеді. Айта кетейік, СҚО-да «Қауіпсіз жол» жедел алдын алу іс-шарасы басталды. Аталған іс-шаралар құқықтық тәртіпті нығайтуға және қозғалыстың барлық қатысушыларының тәртібін арттыруға бағытталған, – дейді СҚО ПД ЖПҚ басқармасының бастығы Айдын Байматов.
