Петропавл қаласындағы Назарбаев зияткерлік мектебінде Дәулет Тоққожинді еске алуға арналған баскетболдан турнир өтті, деп хабарлайды Qyzyljarnews.kz тілшісі.
Жарысқа қаладағы және аудандардағы мектептердің оқушыларынан құралған командалар қатысты. Олар баскетбол алаңында өз шеберліктерін көрсетіп қана қоймай, Петропавл қаласындағы Назарбаев зияткерлік мектебінде дене шынықтыру мұғалімі болып қызмет еткен Дәулет Токкожинге құрмет көрсетті.
— Дәулет Тоққожинді еске алу үшін облыстық баскетбол сайысын өткіздік. Келесі жылы басқа спорт түрінен ұйымдастыруды жоспарлап отырмыз. Жарысты өткізуге әріптесіміздің достары мен туыстары жәрдемдесті, — дейді Назарбаев зияткерлік мектебінің директоры Данияр Уәлиев.
Баскетбол алаңында 32 мектеп, Бэст гимназиясы, NIS, Тайынша және Тимирязев аудандарының оқушылары допты ұршықша иіріп, қарсылас себетіне алма кезек доп салды.
Турнирге қатысушылар барын салып, спорт тек бәсекелестік қана емес, сонымен қатар достық, әріптестік сондай-ақ осы салаға өз өмірін арнаған жандарды еске алу мүмкіндігі екенін көрсетті.
