Солтүстік Қазақстан облысында өткен демалыс күндері 3 тұрғын алаяқтардың «торына» түсіп, 9 млн теңгені аударып жіберген, деп хабарлайды Qyzyljarnews.kz ҚазАқпарат сайтына сілтеме жасап.
СҚО прокуратурасы тұрғындарды алаяқтардың «сіздің туысыңыз апатқа ұшырады» схемасын жиі қолданатыны туралы ескертеді.
Бұл тәсіл негізінен егде жастағы адамдарды алдауға бағытталған, «банктерден қоңыраулар» сияқты мұнда да алаяқтар топ болып әрекет етеді.
Ведомствоның мәліметінше, өткен демалыс күндері өңірдің үш тұрғыны осындай схемамен 9 млн. теңгеге алданып қалған.
Петропавлдың 67 жастағы тұрғынына белгісіз әйел қоңырау шалып, өзін полиция қызметкері ретінде таныстырған және қызының кінәсінен жол-көлік оқиғасы болып, адам зардап шеккенін хабарлаған.
Содан кейін «жалған полицей» бұл мәселені шешіп, жылы жауып қою үшін жәбірленушіге 5 млн. теңге төлеу қажеттігін айтқан.
Тұтқаның ар жағындағы бейтанысқа сенген қала тұрғыны 3 млн. теңге соманы аударған.
Тек кейін ол қызымен хабарласып, бәрі жақсы екендігін және оның ешқандай жол-көлік оқиғасына түспегенін біледі.
— Егер белгісіз адам қоңырау шалып, өзін құқық қорғау органдарының қызметкері ретінде таныстырса және сіздің туысыңыз қиындыққа тап болғанын хабарласа қандай да бір әрекет жасамас бұрын, телефонды қойып, өзіңіздің туысыңызбен байланысуға тырысыңыз. «102» немесе «49-39-49» телефон нөміріне қоңырау шалыңыз. Таныс емес адамдардан түскен қоңырауларға сенбеңіз. Алаяқтарға ақша мен парольдерді бермеңіз. Ақпаратты тексеріңіз. Ресми ұйымдарға қоңырау шалыңыз және мұндай қызметкерлердің шынымен жұмыс істейтінін тексеріңіз, — дейді прокуратура өкілдері.
Жыл басынан бері құқық қорғау органдарына алаяқтық туралы арызбен 315 адам жүгініп, 672 млн. теңгеге алданған.
