СҚО полицейлері білім беру мекемелерінің басшыларымен кездесті, деп хабарлайды Qyzyljarnews.kz тілшісі.
Петропавлдағы Абай атындағы қазақ мектеп-гимназиясында полицейлер қаланың орта және арнаулы білім ошақтары басшыларының орынбасарларымен кездесті. Басты тақырып – кәмелетке толмағандар арасында «жалған терроризм» фактілерінің алдын алу.
– Кездесуге кәмелетке толмағандар жөніндегі учаскелік полиция инспекторлары да қатысты, оларға да бұл ақпараттың пайдалы болары сөзсіз. Сондай-ақ кездесуде терроризмге қарсы заңнамадағы өзгерістер, инженерлік-техникалық қауіпсіздік құралдарын жетілдіруге қойылатын талаптар жеткізілді. Бұдан басқа, қызметкерлер террористік сипаттағы қатерлер туындаған кезде іс-қимыл алгоритмін педагогтармен бірге талқылады, – дейді СҚО ПД экстремизмге қарсы іс-қимыл басқармасының өкілдері.
