Астана қаласында қоян-қолтық ұрыстан әлем чемпионаты өтті. Байрақты бәсекеде ұлттық құрама спортшылары топ жарды, деп хабарлайды Qyzyljarnews.kz тілшісі.
Қоян-қолтық ұрыстан халықаралық дода Жақсылық Үшкемпіров атындағы жекпе-жек сарайында ұйымдастырылды. Биылғы 7-ші әлем чемпионатында 32 мемлекеттен 312 спортшы 17 салмақ дәрежесі бойынша сынға түсті. Ұлттық құрама саңлақтары 21 алтын, 19 күміс және 21 қола медальға қол жеткізді. Жүледегерлер қатарында солтүстікқазақстандықтар да бар. 67 килограмда өнер көрсеткен жерлесіміз Сауран Арапбай екінші орынға қол жеткізсе, үшінші орын Шынар Баймұрзинаға бұйырды.
Әлем чемпионатында жалпыкомандалық есепті Қазақстан құрамасы жеңімпаз атанса, екінші сатыға ресейлік спортшылары жайғасты. Үздік үштікті Өзбекстан командасы қорытындылады.
