Петропавлда кәріз желілерінің құрылысы басталды, деп хабарлайды Qyzyljarnews.kz тілшісі.
Қалалық әкімдіктің ақпаратына сәйкес, «Тазарту, су бұру және су өткізу құрылыстары» мемлекеттік коммуналдық кәсіпорны қолданыстағы арық су бұру жүйелерін жөндеу және салу жоспарын әзірледі. Мамандар көктемгі су тасқынын ескере отырып, Зайсан, Береке, Ойқала шағынаудандарында және Жұмысшы кентінде жаңа суағарларды салмақ. Бүгіндері құны 116 млн. теңгеге жобалық-сметалық құжат дайын, тиісті жұмыстар күзде аяқталады деп күтілуде.
– Мемлекеттік сараптамадан өткен үш жоба әзірленді. Ұзындығы 4,7 км «Солнечный-2» шағынауданының көшелері шегінде, тиісінше ұзындығы 0,7 км және 3,4 км Шухов және Ломоносов көшелерінің шегінде ашық суағарлар жүйесін салу көзделген. Жобалардың жалпы сомасы – 522 млн. теңгеден асады. Қазіргі уақытта материалдар дайындалуда, — деп хабарлады қалалық әкімдіктің баспасөз қызметі.
Петропавлдағы кәріз желілерінің жалпы ұзындығы — 196 км, оның ішінде 100 км – жабық. Соңғы үш жылда қалада 29 км жаңа суағарлдар салынды.
