Солтүстік Қазақстан облысында қылмыстық-атқару жүйесінің №66 мекемеcінде жазасын өтеушіге ұялы телефон әкеліп берген адвокат лицензиясынан айырылып, айыппұл төледі, деп хабарлайды Qyzyljarnews.kz тілшісі.
СҚО прокуратурасының мәліметінше, оқиға былтыр шілде айында болған. Сотталған адамның адвокаты Р.Аитов онымен кездесуге келіп, әңгімелесу кезінде ұялы телефонды беру мүмкіндігін талқылаған.
2022 жылдың 2 тамызында адвокат заң көмегін көрсетемін деген сылтаумен тағы да жазасын өтеушіге келіп, оған ұялы телефонды тапсырды.
Соттың 2022 жылғы 30 қыркүйектегі қаулысымен әкімшілік құқық бұзушылық туралы Кодекстің 1-бөлігінің 481-бабы бойынша Р.Аитовтың ұялы телефоны тәркіленіп, 30 630 теңге мөлшерінде айыппұл түріндегі әкімшілік жазаға тартылды.
Р.Аитов қылмыстық-атқару жүйесі мекемесінде жазасын өтеп жатқан адамға осындай мекемелерде сақтауға және пайдалануға тыйым салынған затты жасырып өткізіп, бермек болды.
Облыс прокуратурасы Р.Аитовты адвокаттық қызметпен айналысу құқығын беретін лицензиядан айыру туралы бастама көтеріп, СҚО Әділет департаменті сотқа талап арыз берді.
2023 жылдың 10 наурызында сот шешімімен СҚО Әділет департаментінің Р. Аитовты лицензиядан айыру туралы талабы қанағаттандырылды.
Ал 21 шілдеде Әділет вице-министрінің бұйрығымен Р.Аитовқа ҚР ӘМ берген адвокаттық қызметпен айналысу құқығына ие мемлекеттік лицензияның қолданылуы тоқтатылды.
