Солтүстік Қазақстан облысында тамыз айындағы орташа ауа температурасы қалыпты шектерде – 17-18 градус жылы болады деп күтілуде, деп хабарлайды Qyzyljarnews.kz тілшісі.
«Қазгидромет» РМК филиалының мәліметінше, бірінші онкүндіктің басында ауа температурасы түнде 12-17, күндіз 25-30, кей жерлерде 34 градус ыстық болады. Одан кейін ауа температурасы түнде 7-12, күндіз 17-22 градусқа дейін төмендейді деп күтілуде. Онкүндіктің соңында термометр түнде қайтадан 12-ге дейін, күндіз 22-27 градусқа дейін көтеріледі.
Екінші онкүндікте күндізгі ауа температурасының одан әрі 28-33 градусқа дейін көтерілуі күтілуде. Содан кейін — түнде 9-14, күндіз — 17-22 градус.
Үшінші онкүндіктің басында ауа температурасының одан әрі төмендеуі түнде 4-9 градусқа дейін, күндіз 12-17 градусқа дейін күтіледі. Онкүндіктің екінші жартысында түнде 9-14, күндіз 17-22 градусқа дейін жылы болады.
Айдағы жауын-шашын мөлшері нормадан жоғары, 42-52 мм болады деп күтілуде.
Ай ішінде өткінші жаңбыр, найзағай, секундына 15-20 метр жел, екінші онкүндіктің басында тұман күтіледі. Үшінші онкүндіктің ортасында бұршақ жаууы мүмкін.
