Құтқарушылар саяжайларда рейд жүргізді, деп хабарлайды Qyzyljarnews.kz тілшісі.
“Ракета” саяжай қоғамдастығында мамандар тұрғындармен тілдесіп, оларды сенбілік өткізуге шақырды. Бейберекет өскен ағаштарды, қираған қоршауларды ретке келтіруді өтінді. Себебі жақында мұнда өрт болыпты. Абаттандыру ережелерінің сақталмауынан қызметкерлер шақырту түскен орынға кеш жеткен.
– Көбіне қызыл жалын тұрғындардың қауіпсіздік ережелерін сақтамауынан орын алады. Біз шақыртуға бірден шығамыз. Бірақ саяжайларда жол тар, кейбір адамдар маңайларын қоршап тастаған. Осындай себептермен кешігеміз. Жыл басынан бері қала маңындағы саяжайларда 58 өрт болды, – дейді қалалық ТЖБ инженері Бекзат Сердалинов.
Кездесу барысында мамандар тұрғындарға өрт қауіпсіздігі ережелері жазылған жадынамаларды таратты. Қала маңында 15-ке жуық саяжай қоғамдастығы бар.
