Петропавлдағы №2 жылу-электр орталығы жылыту маусымына дайын болады. Мұны «Севказэнерго» акционерлік қоғамының бас директоры Анатолий Казановский алға тартып отыр, деп хабарлайды Qyzyljarnews.kz тілшісі.
Анатолий Казановскийдің айтуынша, № 3 және 11 қазандықтар күрделі жөндеу өтіп, тиісті жұмыстар №5, 6, 8 қазандықтарда да жүргізілді. Сондай-ақ № 2, 4, 5, 6 және 7 турбоагрегаттарда ағымдағы жөндеу жұмыстары аяқталды. №2 және №3 түтін құбырлары тексерілді. Қазіргі уақытта №9 қазандық агрегаты күрделі жөндеуден өтуде, ол қыркүйектің 15-не дейін, ал № 3 турбоагрегат — 30 қыркүйекке дейін дайын болады деп сендіруде.
— Жылыту маусымын екі құбырмен бастаймыз. Бұл қаланы толыққанды жылумен қамтуға жеткілікті. Құрылысы тоқтатылған жаңа мұржаға келетін болсақ, бұл құбырсыз-ақ қысты аман-есен өткеруге болады, — дейді Анатолий Казановский.
