Петропавлда өткен тамыз кеңесінде облыстағы сыбайлас жемқорлыққа қарсы қызмет білім беру саласында қосымша төлемдерді заңсыз есептеу және бюджет қаражатын ұрлау фактілері туралы еске салды, деп хабарлайды Qyzyljarnews.kz тілшісі.
Сыбайлас жемқорлыққа қарсы іс-қимыл департаментінің баспасөз қызметінің мәліметінше, ағылшын тілі мұғаліміне жалпы сомасы 3 млн. теңгеден астам қосымша ақыны негізсіз есептеу белгіленді. Залал өтелді.
— Аудандық білім бөлімінің бухгалтері «өлі жандарға» жалақыны аудару арқылы және бөбекжай бухгалтері өзінің банк есепшотына аудару арқылы бюджет қаражатын ұрлау фактілері анықталды. Алдын ала залал бірнеше ондаған млн. теңгені құрайды, — деп хабарлады баспасөз қызметі.
Департамент анықталған сыбайлас жемқорлық тәуекелдерін жою үшін 34 ұсыным әзірледі. Оның 16-сы орталық деңгейге енгізіліп, 18-і жергілікті деңгейде орындалатын болады.
