Петропавлда халық игілігіне берілуі тиіс 16 көпқабатты үйдің 8-не инженерлік-коммуникациялық желілер тартылды, деп хабарлайды Qyzyljarnews.kz тілшісі.
Қалалық әкімдіктің баспасөз қызметінің мәліметінше, жақын арада 8 көпқабатты үйге тұрғындар қоныстана бастайды. Алдағы уақытта аулаларды абаттандыру жұмысы жүзеге асырылмақ. Тағы 6 көпқабатты үйге инфрақұрылым желілері қыркүйек айының соңында тартылса, 2 нысанға қарасты мұндай жұмыстар қараша айына дейін аяқталады.
– Қалалықтар пәтер алысымен баспаналарындағы кез келген мәселелермен мердігерге жүгіне алады. Үй екі жыл бойы кепілдікте болғандықтан, құрылыс компаниясы барлық олқылықтарды түзетуге міндетті.
Сегіз үй «Нұрлы жер» мемлекеттік бағдарламасы аясында салынды. Бір шаршы метрдің бағасы 160 мың теңгені құрап отыр, — делінген қалалық әкімдіктің баспасөз қызметі таратқан ақпаратта.
