Петропавлда қазақ күресінен «Бейбіт күннің батырлары» атты республикалық ашық турнир өтті. Оған еліміздің 11 облысынан және М.Ғабдулин атындағы азаматтық қорғау академиясынан барлығы 82 балуан қатысты, деп хабарлайды Qyzyljarnews.kz тілшісі.
Қазақ күресінен ашық турнир төтенше жағдайлардың салдарын жою кезінде қаза тапқан азаматтық қорғау қызметіндегілерді еске алуға арналды. Биылғы жарыста спортшылар үш салмақ дәрежесі бойынша 66, 74 килограмм және «түйе балуан» санатындағылар арасында мықтыны анықтады.
– Жарыс ел көлемінде алғаш рет ұйымдастырылды. Турнирге республикалық және Азия біріншіліктерінде жүлдегер атанғандар да қатысты. Оның қорытындысы бойынша ақшалай сыйақы қарастырылды. 66 және 74 килограмда өнер көрсетіп, бірінші орынға 200 мың, екіншіге 100 мың, үшінші орын иегерлеріне 50 мың теңге берілді. Сондай-ақ «түйе балуаны» санатында жеңімпазға 300 мың, күміс медальға қол жеткізген спортшыға 200 мың және қола жүлдегерге 100 мың теңге табысталды. Додада әр чемпионның бапкеріне де көтермеақы бөлінді. Оның сомасы 50 мың теңгені құрады. Бұдан бөлек, көрермен көзаймы аталымы да болды, — дейді жарыстың ұйымдастырушысы Дәурен Нұрғожин.
Жарыста 66 килограмда бірінші орын «Қызылжар арландары» клубының мүшесі Мейіржан Берекетовке бұйырса, тағы бір солтүстікқазақстандық балуан Жандос Нұрбек күміс жүлдегер атанды. Бұл салмақта үздік үштікті елордалық Сағындық Әшім мен Ақмола облысының өкілі Нұрсұлтан Найманғазиевтер түйіндеді.
74 килограмда астаналық балуан Бейбарыс Тұрғанбекұлы жеңімпаз атанды. Екінші орынға «Қызылжар арландары» клубының мүшесі Батырхан Қайырбек жайғасты. Сондай-ақ тағы екі бірдей теріскейлік спортшы Дмитрий Динер мен Асхат Халыбай үшінші орынды қанжығаларына байлады.
Көрермен асыға күткен аса ауыр салмақта да бәсеке жоғары болды. «Түйе балуан» атағы үшін күрескен спортшылар арасында жеңіс елордалық Айбат Сейтенге бұйырды. Астаналық балуан облыстық төтенше жағдайлар департаментінің қызметкері Қанат Өмірзақты шан қаптырып, жерлесіміз күміс жүлдені місе тұтты. Ал үшінші орынға Ақжар ауданынан келген Батырбек Хамит қол жеткізді. Турнирдің «Көрермен көзайымы» аталымында 100 мың теңгелік ақшалай сертификат Алматы облысының өкілі Қайрат Сейтахметке берілді.
Биыл Қызылжар төрінде қазақ күресінен өткен алғашқы турнир «Бейбіт күннің батырлары» Қазақстанның өртсөндірушілері мен құтқарушылары қоғамдық қоры демеушілігімен ұйымдастырылды.
