Футболдан ел біріншілігінің 23-ші турында «Қызылжар» клубы өз алаңында «Ақтөбе» командасын қабылдады. Бұл кездесу 0:0 есебімен аяқталды, деп хабарлайды Qyzyljarnews.kz тілшісі.
Бұл турға дейін турнир кестесінде жергілікті «Қызылжар» клубы 5-ші орында келе жатса, «Ақтөбе» екінші сатыда тұрды. Қос команда үшін жеңіс ауадай қажет болды. Сондықтан ойынның бірінші минуттарынан бастап, қонақтар алаң иелерін қыспаққа алса, жерлестеріміз қарсы шабуылдарда гол соғуға тырысты.
Бірінші таймда ақтөбеліктерде есеп ашуға бірнеше мүмкіндік болды. Алайда қырағы қызылжарлық қақпашының арқасында гол соғылмады.
Ойынның екінші бөлімінде де есеп өзгеріссіз қалып, қос команда 1 ұпаймен тарқасты. Осылайша «Ақтөбе» клубы екінші сатыдан үшінші орынға сырғыды. Ал «Қызылжар» командасы 5-ші орнында қалды.
