Өткен эпидемиологиялық маусымда облыста жедел респираторлық вирустық инфекцияны 53 мыңнан астам адам жұқтырды. Бұл сан оның алдындағы кезеңмен салыстырғанда 1,7 есеге көп болып отыр, деп хабарлайды Qyzyljarnews.kz тілшісі.
Облыстық санитарлық-эпидемиологиялық бақылау департаменті басшысының орынбасары Арман Күшбасовтың айтуынша, ЖРВИ-мен ауырғандардың 65 пайызы немесе 35 мыңға жуығы – 14 жасқа дейінгі бала.
— Былтыр қазан айында тұмау жұқтырудың алғашқы деректері тіркелді. Сырқаттанғандардың 90 пайызы «В» типті тұмаумен ауырса, «H1N1» – 8 пайызында және «H3N2» – 2 пайызында кездесті. Осы маусымда, Денсаулық сақтау министрлігінің болжамы бойынша, «В» вирусының қосылуымен «АН1N1» және «АH3N2» вирустары жүреді, соның ішінде «АН1N1» вирусының басым болу ықтималдығы жоғары, — дейді Арман Күшбасов.
Бүгінде облыста ЖРВИ-ді жұқтырғандар саны артып келеді. Маман тұмаудың адамнан адамға оңай таралатын және барлық жерде кездесетін өте жедел жұқпалы ауру екенін айтты. Әр адам тұмау вирустарына сезімтал келеді. Инфекцияны науқас адам таратады.
— Әдетте дене қызуы кенеттен көтеріліп, жөтел пайда болады. Бас, бұлшықет пен буын ауырады, адамда әлсіздік болып, тамағы қырылдайды және мұрыннан су ағады. Жөтел 2 апта немесе одан да көп уақытқа созылуы мүмкін. Ауру жеңіл де өтеді, ал кейде тіпті өлімге әкелуі мүмкін. Жылда 3-5 млн. адамда тұмау ауыр өтсе, соның 290-650 мыңы респираторлық аурулардан қайтыс болады, — дейді Арман Күшбасов.
