СҚО әкімі Ғауез Нұрмұхамбетовтың төрағалығымен аппарат отырысы өтіп, жиында екі мәселе қаралды, деп хабарлайды Qyzyljarnews.kz тілшісі.
Шарада алдымен күзгі орақ науқаны туралы айтылды. Өңір басшысы құрғақ ауа райын барынша пайдаланып, майлы дақылдарды жинауды аяқтау керектігін атап өтті. Сондай-ақ облыс әкімі ауыл шаруашылығы басқармасы мен аудан әкімдіктеріне егінді тәулік бойы қабылдауды қамтамасыз етіп, келесі жылдың тұқымын дайындауды қадағалауды тапсырды.
– Ауыл шаруашылығы техникасы паркіне және ауыл шаруашылығы кәсіпорындарының заманауи астық сақтау қоймаларының болуына талдау жүргізу керек. Аудан әкімдеріне ЖШС және шаруа қожалықтарының еңбек жағдайын, қауіпсіздік ережелерін сақтауды, еңбекақыны уақтылы төлеуді бақылауға алуды тапсырамын, — деді Ғауез Нұрмұхамбетов.
Жедел кеңестің күн тәртібіндегі екінші мәселе жылыту маусымындағы өрт қауіпсіздігіне қатысты болды. Аймақ басшысы өрт сөндіру гидранттарының жұмысқа жарамдылығын және техниканың дайындығын тексеруді тапсырды.
– Аудандар мен Петропавл қаласының әкімдеріне құрғақ шөп пен қамысты дер кезінде шабуды тапсырамын. Өрттің алдын алу жұмыстары белсенді түрде жүргізілуі керек. Жеке үйлерді тексеріп, халықтың әлеуметтік осал топтарын өрт хабарлағыштарымен жабдықталуын қамтамасыз ету қажет, — деді СҚО әкімі.
