Қазанның 22-сі мен 28-і күндері аралығында Қытайдың Ханчжоу қаласында IV жазғы Азия пара ойындары өтеді. Жеңіл атлетикадан ұлттық құрама сапында тірек-қимыл аппараты зақымданған 3 солтүстікқазақстандық спортшы ел намысын қорғамақ, деп хабарлайды Qyzyljarnews.kz тілшісі.
СҚО дене шынықтыру және спорт басқармасының ақпаратына сәйкес, Азия пара ойындарында ұлттық құрама сапында тірек-қимыл аппараты зақымданған жеңілатлеттер арасында «Үміт» мүмкіндігі шектеулі адамдарға арналған спорт клубының өкілдері бар. Олар Сергей Харламов, Иван Залезняк пен Евгений Орлов.
– Сергей Харламов 100 метрге жүгіру және ұзындыққа секіру сайыстарына қатысады. Иван Залезняк биіктікке секірушілер арасындағы жарыста бағын сынаса, Евгений Орлов диск лақтыру мен биіктікке секіруден өз мүмкіндігін сынап көрмек, — дейді «Үміт» клубының аға бапкері Дмитрий Клеев.
