Талдықорғанда жүзуден жастар арасында ел біріншілігі өтті, деп хабарлайды Qyzyljarnews.kz тілшісі.
Чемпионатқа 20 командадан 250-ден астам спортшы қатысуға мүмкіндік алды. Жүлдегерлер қатарынан Петропавлдағы «Дельфин» спорт мектебінің 9 тәрбиеленушісі көрінді.
Жарыстың бірінші күнінде жерлестеріміз 5 медальді қоржынға салды. Еркі стильде қыздар сынында Яна Лукьянчикова 50 метрлік қашықтықты бағындырып, 1-ші орынға қол жеткізді. Ал ерлерде Егор Василенко дәл осы дистанцияда 2-орынды иеленді. Брасс стилінде Дмитрий Турукин 200 метрде күміс жүлдегер атанды. Эстафетада Егор Василенко, Никита Худяков, Кирилл Сидоренко, Артем Казанцев 2-орынға жайғасты. Сондай-ақ ерлерде Артем Казанцев 50 метрлік қашықтықта қола медальді еншіледі.
Ел біріншілігінің екінші күнінде қоржынға тағы екі жүлделі орын түсті. Ерлерде брасс тәсілімен 100 метрге жүзген Дмитрий Турукин күміс медальға қол жеткізді. Эстафетада (50*4) Егор Василенко, Дмитрий Турукин, Кирилл Сидоренко мен Артем Казанцев 2-ші орынды қанжығаларына байлады.
Үшінші күннің қорытындысы бойынша жерлестеріміз тағы үш медаль еншіледі. Барлығы да – күміс жүлде. Кроль тәсілімен 100 метрге жүзген Егор Василенко, брасс сынындағы 50 метрде бақ сынаған Дмитрий Турукин мен 100 метр қашықтықта кролльде Яна Лукьянчикова екінші орыннан көрінді.
