Ресейдің Омбы қаласында «Omsk Best Champ» атты фестиваль өтті. Балалар мен жасөспірімдер қатысқан бишілер байқауында қос петропавлдық ұжым жүлдегерлер қатарынан көрінді, деп хабарлайды Qyzyljarnews.kz тілшісі.
Халықаралық фестиваль Қазақстан мен Ресейдің үздік би ұжымдарын жинады. Биылғы байқауға Ресейдің қалаларынан бөлек, еліміздің Өскемен, Астана, Қарағанды, Петропавлдан келген бишілер қатысты.
Петропавлдық «Vertex dance community» мен «The stylish» бишілері «contemporary» және «dancehall» аталымдарында өнер көрсетті.
– Қаламыздан 8 бен 16 жас аралығындағы 30 биші қатысты. Біз қазылар алқасына 4 биді ұсындық. Нәтижесінде «Vertex dance community» ұжымына 1-ші орын бұйырса, «The stylish» үшінші орынды қанжығасына байлады. Енді алда қарашада Астана қаласында өтетін байқау бар. Онда топ жаруға тырысамыз, — дейді «Vertex dance community» би ұжымының жаттықтырушысы Зарина Оспанова.
Байқауға жалпы 1 жарымға жуық би қатысып, олардың өнерін «ТНТ» телеарнасында «Танцы» шоу бағдарламасының қатысушылары бағалады. ⠀
