Қызылжар ауданына қарасты Боголюбово ауылында әлеуметтік аз қамтылған топқа жатқызылған тұрғындардың ит-мысықтарына чиптер тегін қойылды, деп хабарлайды Qyzyljarnews.kz тілшісі.
Облыстық ветеринария басқармасының мәліметінше, сәуір айынан бері өңірде үй жануарларына чип қою жұмыстары жүргізіліп келеді. Бүгіндері аймақтағы 5455 ит-мысық идентификациялық таңбалаудан өтті. Оның – 103-і Қызылжар ауданына тиесілі.
– Чип қойылған жануарлардың барлығы «Tanba» арнайы ақпараттық жүйесінде тіркелді. Онда иелерінің ЖСН-ы мен ит-мысықтардың денсаулық паспорты көрсетілген. Ветеринария басқармасымен әлеуметтік аз қамтылған топқа жататын азаматтардың хайуанаттарына 12759 чип сатып алынды. Бүгінгі таңда 597 жануар таңбаланды, — дейді облыстық ветеринария басқармасының баспасөз қызметінің мамандары.
Облыс тұрғындары ит-мысықтарға чиптерді жеке ветеринарлық клиникаларда және 14 ветеринарлық станцияда қойдырта алады.
