Тайынша қаласында көпқабатты екі тұрғын үй салынып жатыр, деп хабарлайды Qyzyljarnews.kz тілшісі.
Тайынша ауданы әкімдігінің хабарлауынша, биыл Тайыншада 976,1 млн. теңгеге 50 пәтерге шақталған баспана тұрғызылып жатыр. Нысан 2024 жылы мамыр айында халық игілігіне тапсырылады. Сондай-ақ тағы бір коммерциялық 30 отбасыға арналған көпқабатты үй салынуда. Оның қолданысқа берілу мерзімі белгісіз.
Ауданда тұрғындарды саламатты өмір салтына баулу мақсатында 189 спорттық нысан жұмыс істеп тұр. Биылдың өзінде бұл дене шынықтыру орталықтарында 172 жалпы спорттық шара ұйымдастырылып, оған 6100 адам қатысты. Бүгіндері бұл бағыттағы жұмыстарды күшейту үшін Тайынша қаласында жабық мұз айдынының құрылысы аяқталуға жақын.
– Тайыншадағы жабық мұз айдынын халық игілігіне желтоқсан айында тапсыруды жоспарлап отырмыз. Ал келер жылы Келлеровкада дене шынықтыру-сауықтыру кешенінің құрылысын аяқтаймыз, — дейді Тайынша ауданының әкімі Берік Әлжанов.
