Соңғы үш жылдың ішінде Уәлиханов ауданында 4 клуб пен 1 кітапхана ашылды, деп хабарлайды Qyzyljarnews.kz тілшісі.
Бүгіндері Уәлиханов ауданында тұрғындарға 36 мәдениет мекемесі жұмыс істеп келеді. Биыл ауданда Жамбыл демалыс орталығы мен Аққұдық ауылында клуб күрделі жөндеуден өтті. Бұл мақсатқа жергілікті бюджеттен 9 млн. теңге жұмсалды. Ал Кішкенекөлде орталық алаң қалыпқа келтірілді.
– Мақсатымыз – барлық ауылдарда мәдени орындарды ашу. 2024 жылы Көктерек, Жас ұлан, Тілеусай елдімекендерінде клубтар салу жоспарда бар. Жобалық-сметалық құжаттамасы дайын болған соң, бұл жұмыстарға кірісеміз, — деді Уәлиханов ауданының әкімі Қайрат Пішенбаев.
Белгілі болғандай, алдағы жылы аудан орталығындағы саябақ абаттандырылмақ. Жоба құны – 569 млн. теңге.
