Астана қаласының тұрғыны әлеуметтік желі арқылы алданып, 64 мың теңгесінен айырылды, деп хабарлайды Qyzyljarnews.kz тілшісі.
СҚО сауда және тұтынушылардың құқықтарын қорғау департаментінің мәліметінше, елордалық тұрғын «Instagram» әлеуметтік желісіндегі жарнаманы көріп, «Apple air pods 3» құлаққаптарына тапсырыс берген. Алдын-ала төлем жасаған ол, сатушыға 64 мың теңге аударып, тапсырыс берген заты келмеді.
– Астана тұрғыны тапсырыс берген интернет дүкеннің «Instagram» парақшасында 17 мыңнан астам жазылушы болған. Ал сауда орнының мекенжайы Петропавл К.Сүтішев к-сі, 60-шы үй «Квартал» бизнес-орталығы деп көрсетілген. Алайда, аталған нысанға барған кезде, бұл мекенжайда сұлулық салоны бар екені және сатушының «Instagram» парақшасында жарияланған бейненұсқаулық осы салонның әлеуметтік желісінен көшірілгені анықталды. Қазіргі уақытта алаяқ іздестіріліп жатыр, — дейді СҚО сауда және тұтынушылардың құқықтарын қорғау департаменті басшысының орынбасары Ләзім Мияшева.
