Петропавл қаласындағы Назарбаев зияткерлік мектебінде ҚР Президентінің «Өркен» білім беру грантына үміткерлер үшін демалыс мектебі жұмысын бастады, деп хабарлайды Qyzyljarnews.kz тілшісі.
Балалардың қысқы демалысы кезінде жұмысын бастаған мектепте қаланың орта білім ордаларынан жиналған 25 оқушы оқып жатыр. Бүгіндері ұл-қыздар NIS-та оқуын жалғастыруға мүмкіндік беретін тестілеуге дайындалуда. Қысқа уақыттың ішінде олар математика, қазақ, орыс, ағылшын тілдері мен жаратылыстану пәндерінен білімдерін тереңдетпек.
– Қаңтардың 8-і мен ақпанның 10-ы күндері аралығында оқуын NIS-те жалғастырғысы келетін барлық алтыншы сынып оқушыларының құжаттары қабылданады. Наурыздың 28-29-ы күндері үміткерлер конкурстық іріктеуге қатысады, — дейді Петропавл қаласының Назарбаев зияткерлік мектебі директорының орынбасары Гүлмира Сатанова.
