Петропавлда жылу тарифі өскеннен кейін бұл салада еңбек етіп жүрген жұмысшылардың жалақысы арта түспек. Мұны «Севказэнерго» АҚ басшылығы алға тартып отыр, деп хабарлайды Qyzyljarnews.kz тілшісі.
Монополист компания қалада жылу энергиясын өндіру тарифін 6,5%-ға арттыруды сұрап отыр. Олардың сөзінше, көп жылдан бері осы саладағы қызметкерлердің еңбекақысы өспей келеді. Егер көрсетіліп жатқан қызмет түрінің құны артса, компаниядағы жұмысшылардың табысы да көбеймек. «Севкказэнерго» АҚ табиғи монополияларды реттеу комитетінің облыстық департаментіне осындай ұсыныс жасады.
– 2023 жылға бекітілген тарифті өзгерту туралы ұсыныс түсті. 2024 жылғы қолданыстағы тарифпен (4059,9 теңге/Гкал) салыстырғанда 6,5%-ға өзгереді. Қазіргі уақытта өтініш департаментте қаралып жатыр, – дейді табиғи монополияларды реттеу комитетінің облыстық департаментінің мамандары.
