Ақын, Қазақстанның еңбек сіңірген қайраткері Кәкімбек Салықов көзі тірі болса, биыл 92 жасқа толар еді. Жерлесіміздің құрметіне орай есімі берілген орта мектепке оның бюсты қойылды, деп хабарлайды Qyzyljarnews.kz тілшісі.
Кәкімбек Салықов 1932 жылы қаңтардың 22-сі күні Шал ақын ауданына қарасты Еңбек ауылында дүниеге келген.
– Көрнекті ақын, мемлекет қайраткері, қазақ поэзиясының жезкиігі, жерлесіміз Кәкімбек Салықовтың есімі берілген мектепте бюсттің ашылуы біз үшін үлкен мәртебе. Ардақты тұлғаның есімі берілген білім ордасында тәлім алу, ұстаздық ету үлкен жауапкершілік, зор мақтаныш деп ойлаймын, – дейді Шал ақын ауданы әкімінің орынбасары Арман Дүйсенбинов.
Биыл Кәкімбек Салықов атындағы орта мектепке күрделі жөндеу жұмыстары жүргізілген. Білім ордасы жаңартылып, оқушылардың заман талабына сай білім алуына жағдай жасалған. Алдағы уақытта аудан орталығындағы көшелердің біріне Кәкімбек Салықовтың есімі берілмек.
