Петропавлда абаттандыру ережелерін бұзудың 9 дерегін анықтады, деп хабарлайды Qyzyljarnews.kz.
Петропавл қаласындағы № 11 учаскелік полиция пунктінің инспекторлары «Айсберг» сауда дүкенінен 19 шағынауданға дейінгі аумақты жедел алдын-алу профилактикалық шарасын өткізді. Тәртіп сақшылары бұрын сотталған, отбасылық жанжал шығаруға әуестерді, ішкілікке салынғандарды, кәмелетке толмаған балалар тәрбиеленетін қолайсыз отбасыларды, басқа да есепке алынған адамдарды, сондай-ақ притондар болуы мүмкін деген орындарды тексерді. Нәтижесінде олар 49 әкімшілік құқық бұзушылықты анықтады. Оның тоғызы абаттандыру ережелерін бұзуға қатысты тіркелді.
– Рейдтердің негізгі мақсаты – мас күйінде жасалатын қылмыс пен құқық бұзушылықтардың алдын алу. Қоғамдық орындарда мас күйде жүрудің 3 фактісі анықталды. Осындай жағдайлардың бірінде бұрын құқық бұзушылық жасағаны үшін жауапқа тартылған 35 жастағы қала тұрғынын әкімшілік қамауға алу туралы шешім қабылдауға тура келді. Дүкендердің бірінде алкогольді өнімдер сағат 12-ге дейін сатылған. Бұдан басқа, қабылдап-тарату орнына тұрғылықты жері жоқ 9 адам жеткізілді, – дейді Петропавл қаласы полиция басқармасы жергілікті полиция қызметі бөлімінің бастығы Айдын Ахмағамбетов.
Қару иелеріне де ерекше назар аударылды. Қаруды қайта тіркеу мерзімін өткізіп алған аңшылардың біріне қатысты әкімшілік хаттама толтырылды. Бұзушылық жойылғанға дейін оған тиесілі 3 қару тәркіленіп алынды. Тәртіп сақшылары қоғамдық қауіпсіздікті нығайтуға бағытталған іс-шараларды тұрақты негізде жүргізіп жатыр.
