Биыл өңірде егістік алқабы 2 есеге ұлғайтылады. Бұл туралы облыстық ауыл шаруашылығы және жер қатынастары басқармасының жетекшісі Мейрам Меңдібаев мәлім етті, деп хабарлайды Qyzyljarnews.kz тілшісі mtrk.kz телеарнасына сілтеме жасап.
СҚО ауыл шаруашылығы және жер қатынастары басқармасының мәліметінше, биыл басымдық азықтық дақылдарға беріледі.
– Қарақұмық алқаптарының көлемі 24 гектар болған. Биыл ол 26 мың гектар жерге себіледі. Картоп 1,4 гектар жерге егілсе, жалпы көкөніс алқабы 1,6 мыңға ұлғайтылды, — дейді Мейрам Меңдібаев.
Сондай-ақ белгілі болғандай, биыл диқандарды жеңілдетілген жанармаймен қамту, минералды тыңайтқыштарды субсидиялау бағытында жұмыс жалғасын таппақ. Қазірдің өзінде жанармай алу мақсатында аграрийлерден 1446 өтініш келіп түсті.
– Биыл облыс 256 мың тонна көлемінде минералды тыңайтқыш сатып алмақ. Ол шамамен 3 млн гектар алқапқа енгізіледі. Осы жылы өсімдік шаруашылығын субсидиялауға жергілікті бюджеттен 24 млрд. теңге бөлінді. Оның 7 млрд-тан астамы тыңайтқыштарға бағытталмақ, — дейді басқарма басшысы.
