Облыс тұрғындары қала сыртындағы автожолдардың жағдайына шағымдануда. Олардың сөзінше, қармен бірге асфальт жамылғысы да еріп кетті, деп хабарлайды Qyzyljarnews.kz тілшісі.
Әлеуметтік желі қолданушыларының айтуынша, жолдың жағдайы мәз емес. Мәселен, «Корнеевка – Сергеевка» трассасы кедергілерге толы квестке ұқсайды. Салдарынан теміртұлпар жүргізушілері көліктерін техникалық қызмет көрсету станцияларына жүгінуге мәжбүр.
Тұрғындардың жан-айқайына «ҚазАвтоЖол» ҰҚ» АҚ филиалы түсініктеме берді. Компания жолдың жай-күйін ауа райының жағдайымен түсіндірді.
– Құрметті облыс тұрғындары, қазіргі уақытта түнгі және күндізгі температураның өзгеруіне байланысты жол бойында мұз пайда болады. Қауіпті жол учаскелерінде мұзды алу жұмыстары жүргізілуде. Қолайлы ауа райы жағдайында шұңқырлар бітеледі, — делінген хабарламада.
«Петропавл – Жезқазған» республикалық автожолының учаскесі – аса қауіпті аймақтардың бірі. Қар ерігеннен кейін трасса шұңқырларға толы.
