Солтүстік Қазақстан облысының жаңадан құрылған Қоғамдық кеңесінің алғашқы ұйымдастыру отырысы өтті, деп хабарлайды qyzyljarnews.kz тілшісі.
Жиынды облыстық мәслихаттың хатшысы — Қоғамдық кеңестің жаңа құрамын қалыптастыру жөніндегі жұмыс тобының жетекшісі Владимир Бубенко ашты. Ол қатысушыларға «Қоғамдық кеңестер туралы» Қазақстан Республикасының Заңына сәйкес құрамына 9 адам кіретін жұмыс тобын құру бойынша конкурс өткенін хабарлады. 2021 жылғы 31 желтоқсаннан бастап ағымдағы жылғы 19 қаңтарға дейін жұмыс тобы Қоғамдық кеңестің жаңа құрамын сайлау бойынша конкурс жариялады.
-Құжаттарды қабылдау және қарау аяқталғаннан кейін ағымдағы жылдың 1 ақпанында кандидаттармен әңгімелесу өткізілді, бағалау қорытындысы бойынша Солтүстік Қазақстан облысының Қоғамдық кеңесінің құрамына 21 адам сайланды. Облыстық мәслихат сессиясының 3 ақпандағы шешімімен облыстың қоғамдық кеңесінің сайланған құрамы бекітілді, деді Владимир Бубенко.
Алғашқы отырыста ашық дауыс беру арқылы Қоғамдық кеңестің төрағасы мен төралқасының құрамы сайланды. Кеңес төрағасы болып қоғам қайраткері, жазушы, «Қазақстан Республикасының Жазушылар одағы» облыстық филиалының директоры Жарасбай Сүлейменов сайланды, ол облыстық «Ленин туы» газетінің қызметкерінен бастап төртінші сайланған ҚР Парламенті Мәжілісінің депутатына дейін үлкен еңбек жолынан өткен. Қоғамдық кеңестің төралқасына Олег Завьялов, Бекет Нұғыманов, Асқар Сақыпкереев, Сәуле Сүлейменова және Петр Шарапаев сайланды.
Бір апта ішінде Қоғамдық кеңестің 2022 жылға арналған негізгі мәселелер жоспары құрылады.
