СҚО әкімі Ғауез Нұрмұхамбетов Қызылжар ауданындағы су тасқынынан зардап шеккен Семиполатное, Бескөл, Большая Малышка ауылдарына барды. Өңір басшысы су тартылып жатқан үйлерді аралап, зардап шеккен ауыл тұрғындарымен кездесті, деп хабарлайды Qyzyljarnews.kz тілшісі.
Бүгіндері Дмитрий Фазыловтың үйі тұруға жарамсыз болып қалды. Енді жергілікті диқан Ләззат Жакеева оған басқа үйді алып беріп, жөндеу жұмыстарына кіріскені белгілі болды.
– Су үйлердің аумағынан кеткен кезде тез арада мүлікке техникалық тексеру мен бағалау жүргізу қажет. Бұл жұмыстар қазірдің өзінде аудандарда жүргізілуде. Қызылжар ауданы мен Петропавл қаласының әкімдеріне су тартылған үйлерде тексеру үшін бағалау комиссияларын жылдам іске қосуды тапсырдым. Егер олар үйді жөндеуді ұсынса, қалпына келтіру жұмыстары шұғыл түрде басталуы керек. Ал баспана өмір сүруге жарамсыз болса, біз жаңа үй саламыз немесе екінші нарықтан баспана сатып аламыз, — деді СҚО әкімі.
