Су тасқыны облыстағы электр қуатын тарату желілерінің 729 тірегіне және екі қосалқы станцияға зақым келтірді. Бүгіндері электр желілерінің 98 шақырымын қалыпқа келтіру қажет, деп хабарлайды Qyzyljarnews.kz.
«Севказэнерго» АҚ баспасөз қызметінің мәліметінше, Шал ақын ауданында 10кВ желісінің құрылысы аяқталды. Нәтижесінде Кеңес, Жаңаталап және Жаңажол ауылдарының 200-ден астам тұрғынын тұрақты түрде электр қуатымен қамтамасыз ету мәселесі шешілді.
– Желінің құрылысы кезінде электр қуаты дизельді генераторлардан берілді. «Қызылжар Су» ЖШС уақытша сорғы станциясы үшін электрмен жабдықтау қамтамасыз етілді. Бұл жұмыстарға 60 қызметкер, 13 арнайы техника жұмылдырылды. Ал сәуірдің 21-не қараған түні екінші сорғы станциясы электр қуатына қосылды, — делінген хабарламада.
Қызылжар ауданындағы Вознесенка, Надежка және Боголюбово елді мекендерінің тұрғындарын электр энергиясымен қамтамасыз ету үшін темірбетон тіректер орнатылды. 22 сәуірде ұзындығы 15,6 шақырым болатын 10кВ «Леденово-Боголюбово» жоғары вольтты желісі іске қосылғаны белгілі болды.
Су басқан аудандарды электрмен қамтамасыз ету үшін «Севказэнерго» АҚ қосымша 5 дизельді-генераторлық қондырғыны сатып алды. Олар Новокаменка және Архангелка ауылдарында орнатылған.
