СҚО-дан әскер қатарына шақыртылған екі жас азамат Петропавл стансасындағы пойыз вагонынан қашып кетті, деп хабарлайды Qyzyljarnews.kz тілшісі.
СҚО қорғаныс істері департаментінің мәліметінше, қос азамат сәуірдің 27-сі күні СҚО-дан пойызбен Қарағанды облысының 85510 әскери бөліміне аттануы керек еді. Отан алдындағы борышын өтеуден қашқан 19 жастағы Владислав Коваленко мен 20 жастағы Бақтияр Құсайыновқа іздеу жарияланды.
– Солтүстік Қазақстан облысы қорғаныс істері департаменті бастығының бұйрығына сәйкес, 27 сәуірде аталған азаматтар мерзімді әскери қызметке шақырылып, 85510 әскери бөліміне жіберілді. Алдын ала сөз байласу арқылы бір тәуліктен артық қызмет бөлігін немесе орнын өз еркімен тастап кеткені үшін бес жылға дейінгі мерзімге бас бостандығынан айыру жазасы қарастырылған, — делінген хабарламада.
