СҚО әкімдігінің отырысында балалардың жазғы сауықтыру демалысына дайындық мәселесі қаралды. Биыл облыс бойынша 1-10 сынып оқушыларының 94 пайызын жазғы демалыстың бірнеше түрлерімен қамту жоспарлануда, деп хабарлайды Qyzyljarnews.kz.
Жазғы кезеңде 11 демалыс лагері жұмыс істейтін болады. Маусымның ашылуы 10-15 маусым аралығында жоспарланған. 10 күнге созылатын 5 маусым анықталды, 6145 бала қамтылмақ.
Оған қоса, су тасқынынан зардап шеккен балалардың жазғы демалысын қамтамасыз ету жұмыстары да ұйымдастырылды. Қазірдің өзінде 106 бала демалысқа жіберілді.
Отырыс қорытындысы бойынша СҚО әкімі Ғауез Нұрмұхамбетов жазғы сауықтыру демалысын ұйымдастыру мәселесімен жүйелі түрде айналысу керектігін атап өтті. Аймақ басшысы жазғы лагерьлердің маусым басталуына толық дайын болуын қамтамасыз етіп, балалардың қауіпсіздігіне баса назар аударуды тапсырды.
