САДАҚ АТУДАН ЧЕМПИОНАТ ӨТТІ

Өңірімізде биыл садақ ату федерациясы құрылған болатын. Көп уақыт өтпей аталған спорт түрінен жеткіншектер арасында бірінші рет облыстық чемпионат өтті, деп хабарлайды Qyzyljarnews.kz
СҚО садақ ату федерациясының басшысы Жасұлан Ғаббасовтың айтуынша, ата-бабамыздан келе жатқан өнер бүгінде спорт түріне енген. 16-17 жасқа дейінгі балалар 25 м, 13-15 жастағылар 20 м қашықтыққа ату бойынша бақтарын сынады.
Құралайды көзге атқан мергендер сайысына өңіріміздің 3 ауданынан және қала мектептерінен 20-дан астам бала қатысты. Жас спортшылар аталған спорттың үш түрі бойынша сынға түсті. Олар – жамбы нысанасы, түріктің пут нысанасы және қалқан нысанасы. Жарыс қорытындысы бойынша Қызылжар ауданынан келген мергендер басқаларынан оқ бойы озық болды. Сайыс жеңімпаздары шілдеде Өскеменде өтетін ел чемпионатында бақ сынайды.