Ақжар ауданында жұмыс істеп жүрген 20 жастағы жігіттің үстіне балшық құлап кетті. Көрер жарығы бар екен, ауруханаға ауыр халде түскен зардап шегушіні дәрігерлер аман алып қалды, деп хабарлайды Qyzyljarnews.kz.
Оқиға 11 маусым күні болған. Ақжар аудандық ауруханасының мамандары облыстық көпбейінді ауруханаға хабарласып, ауыр сырқат түскендігін айтқан.
«Ақжарлық әріптестеріміз ер адам бас сүйек-ми жарақатын алуы мүмкін, кеудесі қысылған, мидың гипоксиясы тіркелгендігін айтты. Жігіт біршама уақыт топырақ астында жатып қалған. Ол бірден аудандық ауруханаға жеткізіліп, алғашқы көмек көрсетілді. Реаниматологқа кеңес бердім, қандай ем-дом жүргізу керектігін айттым, өйткені сол уақытта сырқаттың жағдайы оны жедел түрде облыс орталығына жеткізуге мүмкіндік бермеді. Сол себепті аудандық ауруханада жігіт өкпені жасанды желдету аппаратына қосылды. Ал екінші күні жағдайы тұрақталғаннан кейін сан авиация арқылы облыстық ауруханаға жеткізілді», — дейді облыстың штаттан тыс бас анестезиолог-реаниматологы Сергей Ишин.
